د افغانستان د آیودین لرونکي مالګې د تصفیې شرکتونو د اتحادیې د ریاست پُست لپاره د نوملیکنې په اړه د عدلیې وزارت خبرتیا
په دې وروستیو کې د آیودین لرونکي مالګې د تصفیې شرکتونو یو شمېر مسئولینو د عدلیې وزارت د مقام تر سرلیک لاندې د یو رسمي غوښتنلیک په ترڅ کې د افغانستان د آیودین لرونکي مالګې د تصفیې شرکتونو د اتحادیې د جوړېدو غوښتنه کړې ده چې د دغه وزارت اړوندې برخې د یادې اتحادیې د جواز د صادرولو د رسمي پړاوونو په ترسره کولو بوختې دي.
په همدې اساس، د عدلیې وزارت د آیودین لرونکي مالګې د تصفیې شرکتونو ټولو مسئولینو ته خبر ورکوي چې د یادې شوې اتحادیې د ریاست پُست لپاره د نوملیکنې په موخه، خپل غوښتنلیکونه د روان هجري شمسي کال د میزان (تلې) میاشتې له ۲۲مې نېټې څخه د عقرب (لړم) میاشتې تر ۱۲مې نېټې پورې د عدلیې وزارت د انسجام عمومي ریاست ته وړاندې کړي. د ټاکل شوې نېټې له پای ته رسېدو وروسته هېڅ ډول غوښتنلیک د منلو وړ نه دی.
د نوملیکنې لپاره له غوښتنلیک سره د تذکرې کاپي او د اړوند شرکت د صنفي جواز د اسنادو کاپي ضمیمه کول اړین دي.
