د عدلیې وزیر د ارزګان پوهنتون له یو شمېر ښوونکو سره وکتل
د اسلامي امارت د عدلیې وزیر او د ځمکو له غصب څخه د مخنیوي کمېسیون رئیس، محترم شیخ الحدیث مولوي عبدالحکیم شرعي د شعبان المعظم د میاشتې په لومړۍ نېټه د سهشنبې په ورځ د ارزګان پوهنتون له یو شمېر ښوونکو سره وکتل او خبرې وکړې.
په دې کتنه کې د عدلیې وزیر د ځمکو له غصب څخه د مخنیوي کمېسیون د فعالیتونو په اړه معلومات وړاندې کړل او ټینګار یې وکړ چې د امارتي (سلطاني)، عامه مرعی او وقفي غصب شویو ځمکو قضیو ته د رسیدګۍ اختصاصي محکمې اړوندو چارو کې د نهمداخلې په اړه د عالیقدر امیرالمؤمنین حفظهالله تعالی د حکم له مخې، د ځمکو د غصب د مخنیوي اړوند ټول موضوعات د یاد کمېسیون له لوري پر مخ وړل کېږي او هېڅ یوه بله اداره د کمېسیون په کاري چارو کې د مداخلې حق نه لري.
نوموړي وویل چې په یاد حکم کې راغلي دي: «که چېري څوک د ځمکو د غصب د مخنيوي او د غصب شویو ځمکو د استرداد کمېسیون په مرکز او ولايتونو کې د غصب شویو ځمکو د تشخیص او تثبيت تخنيكي هيئتونو څخه شکایت لري، کولای شي خپل شکایت په ليکلي ډول د امارتي (سلطاني)، عامه مرعى او وقفي غصب شویو ځمکو قضیو ته د رسیدګۍ اختصاصي محکمې ته د بررسۍ او حل لپاره وړاندي کړي.»
همدارنګه محترم شیخالحدیث مولوي عبدالحکیم شرعي د ځمکو له غصب څخه د مخنیوي او د غصب شویو ځمکو د استرداد قانون موادو او د ځمکو له غصب څخه د مخنیوي او د غصب شویو ځمکو د استرداد کمېسیون د پرېکړو د تطبیق طرزالعمل ته اشاره وکړه او زیاته یې کړه چې تقنیني اسنادو او د عالیقدر امیرالمؤمنین حفظهالله تعالی فرمانونو او حکمونو په واضح ډول د کمېسیون کاري موخې مشخصې کړي دي.
په دې کتنه کې د ارزګان پوهنتون ښوونکو د ارزګان ولایت او ټول افغانستان په کچه د غصب شویو ځمکو د تثبیت او استرداد په برخه کې د ځمکو له غصب څخه د مخنیوي کمېسیون د فعالیتونو قدرداني وکړه او ویې ویل چې د کمېسیون له اقداماتو څخه ملاتړ کوي.
