د غزني ولایت د عدلیې ریاست او د معاملاتو لارښونو دفترونو د یو شمېر استازو ترمنځ د همغږۍ ناسته جوړه شوه
د غزني ولایت د عدلیې ریاست او د یاد ولایت د معاملاتو لارښوونې د یو شمېر استازو ترمنځ د همغږۍ ناسته د شوال د مياشتې په ۱۰ مه نېټه د سه شنبې په ورځ، د عدلیې رئيس مولوي مطيع الحق عثمان په مشرۍ او د معاملاتو لارښوونې د یو شمېر استازو په ګډون د عدلیې رياست په مقر کې جوړه شوه.
په دې ناسته کې چې د عدلیې رياست نورو مسؤولينو هم پهکې ګډون درلود، د غزني ولایت د معاملاتو لاروښوونې دفترونو په اړه خبرې وشوې او د عدلیې رئيس ټینګار وکړ چې د معاملاتو لارښوونې د دفترونو متصديان دې خپل ټول معاملات د قانون او اصولو په رڼا کې ترسره کړي.
همداراز نوموړي وویل چې دغه متصدیان باید خپل صلاحيتونه او مسؤوليتونه وپېژني، په چارو کې دې له بشپړ دقت څخه کار واخلي او له جعل کارۍ څخه دې ډډه وکړي.
په ورته مهال په دې ناسته کې د معاملاتو لارښوونو دفترونو استازو هم خپلې شته ستونزې شريکې کړې او د حل غوښتونکي شول، چې د عدلیې رياست له لورې د يادو ستونزو د لرې کولو په برخه کې د همکارۍ ډاډ ورکړل شو.
