راستنېدونکو مهاجرینو ته د عدلیې په وزارت کې د ثبت شوو خیریه بنسټونو او اتحادیو ۶۲ میلیوني مرستې
د اسلامي امارت د عدلیې په وزارت کې ثبت شوو خیریه بسنټونو او اتحادیو د تېرو څو میاشتو په ترڅ کې، له ګاونډیو هېوادونو څخه د راستنېدونکو مهاجرانو لپاره څه باندې ۶۲ میلیونه افغانۍ مرسته کړې ده.
د دغو بنسټونو او اتحادیو د راپور له مخې، یادې شوې مرستې د ۲۲ خیریه بنسټونو او د زرګرانو اتحاديې په واسطې ترسره شوي چې راستنېدونکو مهاجرینو ته د مرستې رسولو په برخه کې هر یو له ۲۰ زرو افغانیو تر ۱۸ میلیونو افغانیو پورې لګولي دي.
له دې څخه مخکې، د عدلیې په وزارت کې ثبت شوو خیریه بنسټونو او اتحادیو د هرات زلزله ځپلو لپاره د مرستې رسولو په برخه کې څه د پاسه ۸۰ میلیونه افغانۍ لګولې وې.
د عدلیې وزارت ژمن دی چې د هغو خیریه مرستو د انسجام په برخه کې چې د خیریه بنسټونو له لارې ترسره کېږي لا زیاتې هڅې وکړي ترڅو مرستې اړمنو ته ورسیږي.
