بلخ ولایت کې د ناصر خسرو پروژې ۹۹۴۰ جریبه ځمکه امارتي تثبیت شوه
د بلخ او ارزګان ولایتونو د تخنیکي هیئتونو ناستې ددغو هیئتونو د رئیسانو او غړو په حضور سره جوړې شوې او د یادو ولایتونو کې د ځمکې د غصب د مخنیوي برخه کې یو لړ اقدامات ترسره شوو.
د بلخ ولایت تخنیکي هیئت، له ناستې څخه وروسته ناصر خسرو پروژې ته ولاړ او ددغې پروژې له ټولې ۱۰۸۴۰ جریبه ځمکې څخه يې ۹۹۴۰ جریبه ځمکه د رسنیو په حضور سره امارتي تثبیت کړه او د هغې په اړه یې معلومات وړاندې کړل.
یاد هیئت ددغې پروژې څلور دیوالي شوې ساحې ویجاړې کړې او ځمکه یې کرنې ریاست ته وسپارله. ددغې پروژې د پاتې ۹۰۰ جریبه ځمکې په برخه کې به د مرکزي کمېسیون له تصمیم سره سم اجراآت ترسره شي.
د هیئت غړو ادارو د کرنې د څیړنیز فارم د ۳۷۵ جریبه ځمکې په تړاو خپل غړې معرفي کړل ترڅو د مرکزي کمېسیون له لارښوونې سره سم اجراآت وشي.
په همدې حال کې د ارزګان ولایت تخنیکي هیئت په ترینکوټ ښار کې د یوې هدیرې د یوې اندازه ځمکې له غاصب سره وکتل او نوموړي ته یې لازمې توصیې وکړې. په پایله کې یاد شخص هم ومنله چې غصب شوې ځمکه به بېرته آزاده کړي.
په دغې ناسته کې پریکړه وشوه چې چرمګر دښته د هیئت تر نظارت او بررسۍ لاندې ونیول شي او د هغې امارتي ملکیتونه دې مشخص او د غاصبینو دکار مخ هم ونیول شي.
