د پکتیا ولایت د عدليې رییس د ګردې څېړۍ د حقوقو لوی مدیریت څخه لیدنه وکړه
د پکتیا ولایت د عدلیې رییس مولوي محمد رییس محمدی او ورسره ملګرۍ پلاوي د صفرالمظفر میاشتې په ۱۸ نېټه د چهارشنبې په ورځ د ولسوالیو د حقوقو لوی مدیریتونو د نظارت په لړ کې د ګردې څېړۍ د حقوقو له مدیریت څخه لیدنه وکړه او د دغې ولسوالۍ د حقوقو لوی مدیر چې نوی مقرر شوی دی د دغې ولسوالۍ مسوولینو او کارکونکو ته معرفي کړ.
په دغه سفر کې له عدلیې رییس سره د امارت د قضایاو آمر، د حقوقو آمر او د قضایاو د ثبت لوی مدیر ملګري ول.
یاد پلاوي د یو لړ مراسمو په ترڅ کې مولوي مراد ګل د ګردې څېړۍ ولسوالۍ د حقوقو لوی مدیر په حیث د دغې ولسوالۍ کارکوونکو او مسوولینو ته معرفي کړ او د دغه مدیرت کاري بهیر یې له نږدې وڅاره. همدا راز یاد پلاوي د دغه مدیرت د کارکونکو ستونزې واوریدې او له هغوی سره یې ژمنه وکړه چې د هغوی ستونزو ته به ډېر ژر رسیده ګې وشي.
په دغه سفر کې، د پکتیا ولایت د عدليې رییس او ورسره ملګري پلاوي د ګردې څېړۍ ولسوالۍ له ولسوال مولوي لعل پادشاه حکمت، امنیه قوماندان، د استخباراتو مسوول، د امر بالمعروف او د یادې ولسوالۍ له جنايي مسوول سره وکتل او د حقوقو لوی مدیریت ستونزو او مسوولیتونو او د عامه او امارتي ځمکو د غصب څخه د مخنیوي په اړه یې خبري وکړې.
همدا راز په دې لیدنه کې د دولتي او عامه ملکیتونو د عرایضو او دعواوو په اړه وویل شول چې مصالحه او منځګړیتوب ونشي او دغه راز قضایاوې په مستقیمه توګه د امارت د قضایاو آمریت ته راجع شي ترڅو له دغې لارې هغو ته رسیده ګي وشي.
د عریضې لیکونکو په اړه هم پریکړه وشوه هرڅوک چې غواړي د عریضې لیکوونکی شي، لومړی باید له عدليې ریاست څخه د عریضې لیکنې جواز ترلاسه کړي. که چېرې څوک بې له جواز څخه په دغه کار اقدام وکړي هغه سره به قانوني چلند وشي.
یاد پلاوي د دغې ولسوالۍ له خلکو سره هم ولیدل او د هغوی ستونزې یې واورېدې. پلاوي هغوی ته ډاډ ورکړ چې د هغوی حقوقي ستونزو ته به رسیده ګي وشي.
