یو شمېر غوښتونکو ته، د معاملاتو د لارښوونې د فعالیت جوازلیکوونه وویشل شول
د عدليې وزارت د انسجام لوی ریاست د معاملاتو د لارښوونې او عریضه لیکوونکو د چارو ریاست د ۱۴۴۴ هجري قمري کال د ذوالحجې د میاشتې په ۲۲ نېټه د دوشنبې په ورځ یو شمېر غوښتونکو ته، د معاملاتو د لارښوونې د فعالیت جوازلیکوونه وویشل.
په هغو مراسمو کې چې په همدې مناسبت په عدلیې وزارت کې جوړ شوې وو، د الله تعالی د سپیڅلي کلام د څو آیاتونو په تلاوت سره پیل شول او د عدليې وزارت د انسجام لوی رئیس مولوي رحمت الله حقاني، د معاملاتو د لارښوونې او عریضه لیکوونکو د چارو رئیس مولوي سکندر یحیی عابد او د یاد وزارت نورو مسؤلینو برخه اخیستې وه.
په دغو مراسمو کې د عدليې وزارت د انسجام لوی رئیس مولوي رحمت الله حقاني د موضوع په تړاو خبرې وکړې او د معاملاتو د لارښوونې د فعالیت جواز غوښتونکو سره یې لازم معلومات شریک کړل.
نوموړي هغوی خپلو مسوولیتونو او مکلفیتونو ته متوجه کړل ویې ویل چې د معاملاتو د لارښوونې جواز یواځې یو جواز نه دی بلکې د خلکو ترمنځ ستاسې د نیکې معاملې د اعتبار سند دی او تاسې باید هغه ژمنه په پام کې ونیسئ چې له لوی څښتن تعالی، د افغانستان شریف ولس او عدلیې وزارت سره لرئ، په خپلو ټولو معاملاتو کې د الله تعالی رضایت په پام کې ولرئ او په معاملاتو کې له هر ډول فریب کارۍ، غل او غش څخه ډډه وکړئ ترڅو زموږ د ځوریدلي ولس دردونو ته مرحم او ټپونو ته پټۍ اوسئ. دغه راز نوموړي هغوی له اسلامي امارت سره همکارۍ ته وهڅول.
په دغو مراسمو کې، د معاملاتو د لارښوونې د فعالیت جواز غوښتونکي له دغې دندې سره د هغوی لازیاتې پېژندګلوۍ او د هغوی د مسؤلیتونو او مکلفیتونو په اړه پوهاوی او لازم معلومات ورکړل شول او ۲۰ تنو غوښتونکو ته، د معاملاتو د لارښوونې د فعالیت جوازلیکوونه، وویشل شول.
