په کندز ولایت کې څه دپاسه ۳۱ جریبه ځمکه بررسي او استرداد شوه
د کندز ولایت د ځمکو د غصب د مخنیوي د تخنیکي هیئت ناسته د ذوالقعدې میاشتې په ۲ نېټه د دوشنبې په ورځ د هیئت د رئیس او غړو په حضور سره جوړه شوه او د غصب شویو امارتي ځمکو د استرداد په اړه په کې لازم تصمیمونه ونیول شول.
په دغې ناسته کې، د علي آباد ولسوالۍ په لاله میدان کې د ۳۱ جریبه او ۸ بسوې ځمکې دوسیه د دعوا د لورو او متصرفینو په حضور کې بررسي شوه او د متصرف د اقرار او اعتراف او د ترسره شویو املاکي څېړنو په پام کې نیولو سره، یاده شوې ځمکه استرداد شوه او پریکړه وشوه چې ځمکه د هغې متصرف ته په اجاره ورکړل شي.
دغه راز په دغې ناسته کې د یو شخص تر تصرف او ګټې اخیستنې لاندې د زیر دوره په سړک کې د ۴ دوکانونو دوسیه بررسي شوه او د هغې د امارتي توب په اړه د متصرف د اعتراف له امله، یاد شوي دوکانونه استرداد شول او د هغو د اجارې ورکولو په برخه کې لازمې لارښوونې وشوې.
