په بلخ ولایت کې د ۱۸۰۰ جریبه امارتي ځمکې تثبیت
د بلخ ولایت د ځمکو د غصب د مخنیوي د تخنیکي هیئت ناسته د صفرالمظفر د میاشتې په ۱۸ نېټې د دوشنبې په ورځ د دغه هیئت د رئیس او غړو په حضور سره جوړه شوه او په دغه ولایت کې د ۳۳۵۰ جریبه ځمکې دوسیې په کې بحث او بررسۍ لاندې ونیول شوې.
په دغې ناسته کې، د بلخ ولسوالۍ د نوارد بوکه کلي د ۱۸۰۰ جریبه ځمکې راپور وړاندې شو او د تایید وړ وګرځید او یاده شوې ځمکه د هغې د متصرف له خوا د شرعي او د حکم وړ سندونو د نه وړاندې کیدو له امله، امارتي تثبیت شوه. دغه راز د یاد ولایت یو اوسیدونکي ته د حیرتان په دوه لاري کې د ۱۵۵۰ جریبه ویشل شوې ځمکې راپور وړاندې شو او د تائید وړ وګرځید.
دغه راز په یاده ناسته کې د مزار شریف ښار په پلاني او غیرپلاني ساحو کې د ښاروالۍ د پراختیایي پلانونو د تطبیق، دغه ولایت کې د یو شخص د جایدادونو د بررسۍ، د یاد ولایت د مقام په خوا کې د ودانیو، د ځمکو د غصب د مخنیوي کمېسیون د لارښوونو او د یو شمېر عریضو په اړه بحث او د نظرونو تبادله ترسره شوه او په دغې برخه کې لازم تصمیمونه ونیول شول.
