د کابل ولایت د څلورمې ناحیې په ریاست کې د حقوقي پوهاوي ورکوونې برنامه جوړیدل
د همغږۍ او حقوقي پوهاوي ورکوونې ناسته د محرم الحرام د میاشتې په ۶ نېټه د یکشنبې په ورځ د عدليې وزارت د حقوقي مرستو رئيس مولوي حافظ عبدالصمد عمري په مشرۍ او د کابل ښار څلورمې ناحیې د رئیس مرستیال، د ګذر وکیلانو د رئیس، د شوراو رئیسانو او د څلورمې ناحیې ټول پرسنول په ګډون د یادې ناحیې په ریاست کې جوړه شوه.
یاد ناسته د کلام الله مجید د څو آیاتونو په تلاوت سره پیل شوه او د حقوقي مرستو رئیس د یاد ریاست دندو او صلاحیتونو په تړاو په کې خبرې وکړې، ویې ویل چې عدلیې وزارت د یاد ریاست چتر لاندې د پوهاوي ورکوونې یو ټیم توظیف کړی ترڅو د هیواد له ولس سره په دوامداره او اغیزمنه توګه اړیکې ټینګې کړي او حقوقي موضوعات د اسلامي شریعت حکومنو په پام کې نیولو سره هغوی پورې ورسوي.
نوموړي وویل چې بې وزله تورن او شکمن کولی شي په عدلي او قضایي مراجعو کې د هغوی حقوقو څخه د دفاع په غرض د حقوقي مرستو ریاست څخه د حقوقي مرستندوی توظیف غوښتنه وکړي.
په پای کې د څلورمې ناحیې د رئیس مرستیال د یادې ناحیې د ګذر وکیلانو او ټول پرسنول په استازیتوب، د عدلیې وزارت له برنامو څخه قدرداني وکړه ویې ویل چې اوسنیو شرایطو کې د حقوقي پوهاوي ورکوونې پروسه د هغو ننګونو پورته کولو له پاره چې د ولس پر وړاندې قرار لري، ډیره اغیزمنه او ګټوره ده.
دغه راز د یادې ناستې ګډونوالو خپل پوښتنې او وړاندیزونه مطرح کړل چې د عدليې وزارت د عامه حقوقي پوهاوي ورکوونې برخې رئیس او کارکوونکو له لوري د قناعت وړ ځوابونه وړاندې شول.
