د کابل او خوست ولایتونو د تخنیکي هیئتونو د ناستو جوړیدل
د کابل او خوست ولایتونو د ځمکې د غصب د مخنیوي د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او دغو ولایتونو کې هم له ځینو ساحو څخه لیدنه وشوه.
د کابل ولایت تخنیکي هیئت ددغه ښار د لسمې ناحيې اړوند د شیرپور له ساحې څخه لیدنه وکړه او د ناحیې له مسوولینو او ددغې ناحیې د ګذر له وکیلانو سره یې وکتل.
یاد هیئت له هغوی سره په دغې ناحیې کې د ځمکې د غصب په اړه بحث او خبرې وکړې او د یادوو شو ساحو متصرفینو ته معلوماتي استعلامونه جوړ کړل چې راتلونکي ورځ به هغوی ته وویشل شي.
په همدې حال کې د خوست ولایت د تخنیکي هیئت په ناسته کې، د یو شخص د ۴۲۰ جریبه ځمکې د لیږدولو اړوند دوسیه بررسي شوه ترڅو له بشپړېدو څخه وروسته مرکزي کمېسیون ته واستول شي.
یاد هیئت د غاصبینو وسایط چې څه موده مخکې ددغه هیئت لخوا ضبط شوې وه، بېرته په تضمین سره هغوی ته وسپارل.
دغه راز یاد شوي هیئت د صبرۍ ولسوالۍ په خلبساط حجرو ساحه کې پر ۲۸ جریبه شخصي ځمکې د کار د نه مخنیوي په اړه دغې ولسوالۍ ته لیک واستو.
