د پکتیا ولایت د محکمو او د یاد ولایت د عدلیې ریاست ترمنځ د همغږۍ ناسته جوړیدل
د پکتیا ولایت د عدلیې رئیس مولوي محمد رئیس محمدي او له هغه سره مل پلاوٍي د جمادي الاول میاشتې په ۲۰ نېټې د دوشنبې په ورځ د یاد ولایت د استیناف محکمې له رئیس مفتي عبیدالله خالد سره وکتل او خبرې وکړې.
په دغې کتنه کې چې د یاد ولایت د عدلیې ریاست او محکمو ترمنځ د لازیاتې همغږۍ په منظور ترسره شوه، د حقوقي مساعدتونو آمر، د مدافع وکیلانو د نظارت آمر، حقوقي مساعد او د دغه ولایت د ځمکو د غصب د مخنیوي د تخنیکي هیئت سکرتر هم حضور درلود.
په دغې کتنه کې، د پکتیا ولایت د عدلیې رئیس د امارت د قضایاو آمریت دوسیو ته د رسیدګۍ، د حقوقو آمریت په دوسیو کې د تضمین موجودیت او نه موجودیت، د حقوقي مساعدتونو آمریت ته د درېیو تنو تورنو د پېژندلو موضوع، د عریضه لیکونکو ستونزو او نورو مواردو په اړه خبرې وکړې او په دغې برخه کې د یاد ولایت د استیناف محکمې له ریاست څخه د همکارۍ غوښتنه وکړه.
د پکتیا ولایت د استیناف محکمې رئیس هم دغو دوو ریاستونو ترمنځ په لازیاتې همغږۍ او همکارۍ ټینګار وکړ او ژمنه یې وکړه چې د یادو ستونزو د حل په برخه کې به د دغه ولایت له عدلیې ریاست سره همکاري وکړي.
