د ننګرهار ولایت د عدلیې ریاست له لورې د دست کمک خیریه بنسټ وتړل شو
د عدليې وزارت د محترم مقام د حکم پر اساس، د دست کمک خیریه بنسټ دفتر په ننګرهار ولایت کې د عدليې ریاست او اړونده هیئت له لوري وتړل شو او اجناس یې ضبط شول.
ګډ هیئت چې په جوړښت کې یې د ولایت د محترم مقام، د عدليې ریاست او د ننګرهار د امنیه قوماندانۍ استازو حضور درلود د صفرالمظفر میاشتې په ۳۰ نېټه د دوشنبې په ورځ یاد دفتر بند کړ. دغه راز د یاد خیریه بنسټ ټول اجناس چې ۲۵ قلمه اجناس په کې شامل ول د هیئت په حضور کې ضبط او عدليې ریاست ته وسپارل شول.
د یادونې وړ دی چې د یاد بنسټ جواز د عدليې وزارت د محترم مقام د حکم پر اساس د محرم الحرام په میاشتې کې لغو شو او د ننګرهار ولایت د عدلیې ریاست ته لارښوونه وشوه چې د فعالیت مخه یې ونیسي چې دغه ریاست د ولایت مقام او نورو ارګانونو په همغږۍ سره اقدام وکړ.
