د عدلیې وزارت د یو کال په ترڅ کې د بې وزلو تورنو او مظنونینو اړوند، ۱۶۷ قضیو څخه دفاع کړې.
د عدلیې وزارت د تېر یو کال په ترڅ کې د بې وزلو تورنو او مظنونینو اړوند له ۱۶۷ قضیو څخه په عدليي او قضایي بنسټونو کې دفاع کړې. د دغو قضیو څخه دفاع؛ د دغه وزارت د حقوقي مرستو ریاست د حقوقي مرستندویانو لخوا ترسره شوې.
دغه راز یاد ریاست د دغه کال په بهیر کې یوازې په مرکز کې ۶ زره او ۹۳۶ تنو له پاره د حقوقي پوهاوي برنامه جوړه کړې او د شریعت د حکمونو په رڼا کې د زعیم (مشر) صلاحیتونه او مکلفیتونه او د غصب تر عنوان لاندې دوه تبلیغاتي ګڼې چمتو کړي او لیکلي دي.
دغه راز یاد ریاست، ۱۳۶ تنو غوښتونکو له پاره وړیا حقوقي مشورې وړاندې کړي او په ټولنیزو پاڼو کې يې زیات شمېر شرعي او حقوقي پیغامونه خپاره کړي دي.
دغه ریاست هر ورځ په دغه ریاست کې عقیدتي درسونه ترسره کوي او د لاښه انسجام او هېوادوالو ته د خدمتونو د وړاندې کولو په منظور خپلې غونډې هم په منظم ډول ترسره کوي.
