د عدلیې وزارت د حقوقي مرستو رئيس د بدخشان والي سره وکتل
د عدلیې وزارت د حقوقي مرستو رئيس مولوي جان محمد «محمد طلحه» او ورسره مل پلاوي، د هېواد شمالي ولایتونو ته د سفر په لړ کې د رجبالمرجب د مياشتې په ۲مه نېټه د سهشنبې په ورځ بدخشان ولایت ته ولاړ او د یاد ولایت له والي، مولوي محمد اسماعيل غزنوي سره یې وکتل.
په دې کتنه کې د بدخشان یو شمېر نورو سيمهییزو مسؤولينو هم ګډون درلود او د عدلیې وزارت د حقوقي مرستو رئيس پهکې د وړيا حقوقي مرستو او مشورو د وړاندې کولو څرنګوالي، په جزایي قضيو کې حقوقي مرستو ته د بېوزلو زیانمنو، تورنو او شکمنو د لاسرسي او په کورنيو قضیو کې بېوزلو ښځو او ماشومانو ته د وړيا حقوقي مرستو وړاندې کولو، په مرکز او ولایتونو کې د عامه پوهاوي برنامو جوړول، په ټول هېواد کې د ۱۸۸ شمېرې له لارې په وړيا ډول د حقوقي مشورې ورکولو، په عدلي او قضایي مراجعو کې د حقوقي مساعدینو د ستونزو او یو شمېر نورو موضوعاتو په اړه خبرې وکړې او مسؤولينو سره یې لازم معلومات شریک کړل.
له بلېخوا د بدخشان والي، مولوي محمد اسماعيل غزنوي د عدلیې وزارت د حقوقي مرستو رياست پلاوي ته د همکارۍ ډاډ ورکړ او زیاته یې کړه چې د ولایت د مقام په اداري ناستو کې به یاد رياست سره د اړوندو ادارو د لا زياتو همکاريو په هکله خبرې وکړي.
همدارنګه د بدخشان ولايت د استيناف محکمې رئيس، مولوي محمد صابر حنفي هم خبرې وکړې او ويې ويل چې اسلامي امارت د ټولو ګډ کور دی او نظام او خلکو ته خدمت د ټولو ګډ مسؤوليت دی. نوموړي زياته کړه چې د عدليې رياست د حقوقي مرستو آمريت ته به په اړوندو محکمو کې لا زياتې اسانتياوې برابرې شي.
