د جوزجان او تخار ولایتونو د تخنیکي هیئتونو ناستې جوړې شوې
د جوزجان او تخار ولایتونو د ځمکې د غصب د مخنیوي د تخنیکي هیئتونو ناستې ددغو هيئتونو د رییسانو او غړو په حضور سره جوړې شوې او دغو ولایتونو کې د غصب شوو ځمکو دوسیې او سندونه پکې تر بحث او بررسۍ لاندې ونیول شوو.
د جوزجان ولایت د تخنیکي هیئت په ناسته کې، د کادستر د مسلکي ټیم راپور د عامه مرعی ځمکو د بررسۍ، مساحت، نقشې او کروکي برخه کې وړاندې شوو. یاد ټیم او د امارت د قضایاو آمریت موظف شوو چې دغې برخه کې سندونه او څېړنې بشپړې کړي.
دغه راز یاده ناسته کې، په عامه مرعی ځمکو کې د ودانیو او کښتونو د بندولو په برخه کې د کمېسیون د مشرتابه د لارښوونې په اړه بحث وشو او لازم تصمیمونه ونیول شوو او د لازیاتې همغږۍ په اړه د جوزجان ولایت د والي له مرستیال سره هم دغې برخه کې کتنه وشوه.
یاد هیئت یو مسلکي ټیم توظیف کړ ترڅو د کمېسیون له لارښوونې سره سم، په مرنجان کلي د یو شمېر اشخاص لخوا د امارتي غصب شوو ځمکو په اړه ددغې ساحې معلومات او اصولي سندونه بشپړ کړي.
دغه راز یاد شوي هیئت ددغه هیئت سکرتریت ته دنده وسپارله ترڅو د کمېسیون له لارښوونې سره سم د هغو مالدارانو عریضې چې ادعا کوي، د هغوی څړځایونه د زورواکو لخوا غصب شوي دي، د قضيې له دواړو لورو څخه سندونه وغواړي او ورپسې یو ټیم د بررسۍ له پاره ساحې ته ولاړ شي او خپل راپور جوړ او هيئت ته وړاندې کړي.
په همدې توګه یاده شوې ناسته کې د خوړو ادارې اړوند د ګدام ساحې ددعوا په اړه د ولایت د مقام لیک بررسي شو. دغې ساحه کې د مخکنۍ ادارې د ښوونې ریاست لخوا یو درې پوړیزه ودانۍ جوړه شوې ده. یاد شوي هیئت د ښوونې رییس او د خوړو ادارې مدیر غونډې ته وغوښتل او مشخصه شوه چې د یادې ځمکې دوسیه د مخکنۍ ادارې د امارت د قضایاو لخوا له پړاونو څخه تېره شوې او مرکز ته استول شوې ده. یاده قضیه عدليې ریاست ته ارجاع شوه ترڅو هغې ته رسیده ګي وشي.
دغه هیئت د سه شنبه کلي د ترکستان په نوم ښارګوټي او منګوټي کلي د امارتي غصب شوو ځمکو په اړه د سکرتریت راپور او ټول شوي سندونه بررسي کړل. د یادو قضیو په اړه څېړنې دوام لري؛ پردغه اساس یو مسلکي او فني ټیم موظف شو ترڅو د مرکزي کمېسیون له لارښوونې سره سم یادې شوې ساحې په بشپړ دقت سره بررسي کړي.
دغې ناسته کې، د افغان ګاز د تصدۍ ریاست د غصب شوو ځمکو په اړه د سکرتریت راپور بررسي شو. د کادستر مسلکي ټیم ته دنده وسپارل شوه چې ټولې څېړنې او اصولي سندونه بشپړ کړي.
په همدې حال کې، د تخار ولایت د تخنیکي هیئت ناسته هم ددغه هیئت د رییس او غړو په حضور سره جوړه شوه او پکې د سندونو او دوسیو د بررسۍ، د شکایاتونو اوریدل او راتلونکي ورځ له پاره ساحوي پلانو جوړولو په اړه بحث او خبرې وشوې.
