د تخنیکي او مسلکي زده کړو د ادارې د ملکیتونو د استرداد په منظور ناسته جوړه شوه

د تخنیکي او مسلکي زده کړو د ادارې ملکیتونه چې د ښوونې او لوړو زده کړو وزارتونو تر تصرف لاندې دي؛ د استرداد په منظور يې د عدلیې وزارت په تالار کې ناسته جوړه شوه.

دغه ناسته د یادې ادارې له غوښتنې څخه وروسته د امیرالمومنین حفظه الله د حکم پر اساس، د یادې ادارې د ملکیتونو د سپارلو په منظور چې اوس مهال د لوړو زده کړو محترم وزارت او د ښووني وزارت په تصرف کې دي، د اړونده ادارو د استازو په ګډون جوړه شوه.

د کابینې د پرېکړې پر اساس د عدليې وزارت مسلکي معین شیخ عبدالکریم حیدر او د علومو د اکاډمۍ معین مولوي عرفان الله عرفان صاحب زاده ګمارل شوي دي چې دغې قضیې ته رسیده ګي وکړي او راپور يې د ریاست الوزار اداري معاونیت ته وړاندې کړي.

په یاده ناسته کې، د عدليې وزارت مسلکي معین شیخ عبدالکریم حیدر، د ښوونې وزارت معین مولوي سخا‌ءالله او د سندونو او اړیکو رییس، د دارالحفاظونو رییس او د دغه وزارت د شخړو د حل مدیر، د تخنیکي او مسلکي زده کړو د ادارې لوی رییس مولوي غلام حیدر شهامت، مالي مرستیال، د خدمتونو او ملکیتونو رییس، تخنیکي مشاور، حقوقي مشاور د دغې ادارې د ملکیتونو آمر او د جایدادونو د ثبتولو مدیر، د لوړو زده کړو د وزارت د مالي او اداري چارو معین مولوي حافظ حامد حسیب او د دغه وزارت د کیفیت د تضمین رییس او د ملکیتونو او زیربناوو رییس او د علومو د اکاډمۍ معین مولوي عرفان الله عرفان صاحب زاده ګډون کړی وو او د موضوع په اړه يې خبرې وکړې.

په دغې ناسته کې یادو ادارو د دعوا تر لاندې د ملیکتونو په اړه معلومات ورکړل، او خپل اثباتیه سندونه او مدارک یې وړاندې کړل.

په پایله کې څرګنده شوه چې د سرپل ولایت د ادارې او حساب دارۍ د انستېتوت ودانۍ، هرات ولایت کې څېړنیز مرکز، په کابل کې د ATVI انستېتوت ودانۍ او د بشري سرچینو ۷ پوړه ودانۍ  چې اوس مهال د ښوونې وزارت تر تصرف لاندې ده، د تخنیکي او مسلکي زده کړو ادارې پورې اړه لري.

دغه راز پرېکړه وشوه چې د کندهار ولایت د کرنې د انستېتوت ځمکه چې اوس مهال د لوړو زده کړو وزارت تر تصرف لاندې ده، د تخنیکي او مسلکي زده کړو ادارې پورې اړه لري او همدغه راز پرېکړه وشوه چې په خوست ولایت کې میخانیکي انستېتوت چې اوس مهال د دفاع وزارت مجاهدین په کې هستوګنه لري د تخنیکي او مسلکي زده کړو ادارې پورې اړه لري او دغې ادارې ته دې وسپارل شي.

دغه راز پرېکړه وشوه چې په بلخ ولایت کې د نفت او ګازو د انستېتوت ودانۍ هم د تخنیکي او مسلکي زده کړو ادارې پورې اړه لري او د کندز ولایت د کرنې او وترنرۍ انستېتوت د ۹ جریبه او ۳ بسوې ځمکې په تړاو د تخنیکي او مسلکي زده کړو د ادارې ادعا په اړه پرېکړه وشوه چې دغه موضوع د اړیکې له حیثه د شخړو د حل کمېسیون ته راجع شي.