د امر بالمعروف او نهی عن المنکر محتسبینو د پنجشیر ولایت له عدلیې ریاست څخه لیدنه وکړه
د امر بالمعروف او نهی عن المنکر محتسبینو د جمادي الاول میاشت په ۱۹ نېټه د سه شنبې په ورځ د پنجشیر ولایت له عدلیې ریاست څخه لیدنه وکړه او ددغه ریاست له رییس او کارکوونکو سره یې وکتل.
په دغې لیدنه کې، د پنجشیر ولایت د عدلیې رییس الحاج مولوي سیف الله منصور عدليې ریاست ته د هغوی د راتګ هرکلی وکړ او ددغه ولایت د امر بالمعروف او نهی عن المنکر د محتسبینو کړنې يې وستایلې.
هغه زیاته کړه چې د عدلیې ریاست ټول پرسونل په ټاکل شوي وخت خپلو دندو ته حاضر دي او د پرسونل د چلند د اصلاح په برخه کې د اسلامي شریعت له حدودو سره سم نظارت ترسره شوی دی.
هغه زیاته کړه چې ددغه ریاست ټول کارکوونکي د اسلام سپیڅلي دین په اصولو او ارښتونو برابر دي.
په دغې لیدنه کې، د امر بالمعروف او نهي عن المنکر محتسب نور احمد ثاقب په خپل دیني وعظ کې د آیتونو او حدیثونو یادونه وکړه او ددغه ریاست کارکوونکو ته يې سپارښتنه وکړه چې په جماعت سره لمونځونه، درس او تعلیم د خپل ژوند په سرمشق کې ونیسي او خپل صورت او سیرت له نبوي (صل الله علیه وسلم) سنتو سره سم عیار کړي.
