د سرپل ولایت له مقام سره د یاد ولایت د تخنیکي هیئت د همغږۍ ناسته جوړیدل
د سرپل ولایت د ځمکو د غصب د مخنیوي تخنیکي هیئت د جمادي الاول میاشتې په ۲۸ نېټې د سه شنبې په ورځ د سرپل ولایت له مقام او د یاد ولایت له امنیتي مسؤولینو سره د همغږۍ ناسته جوړه کړه او د دغه هیئت د لاسته راوړنو راپور یې له هغوی سره شریک کړ.
په دغې ناسته کې چې د یاد ولایت د مقام د غونډو په تالار کې جوړه شوه، د سرپل ولایت والي الحاج محمد یعقوب عبدالرحمن اکه، امنیه قوماندان، د استخباراتو رئیس، د یاد ولایت د تخنیکي هیئت رئیس او غړو ګډون درلود.
په دغې ناسته کې، د سرپل ولایت د تخنیکي هیئت رئیس د تخنیکي هیئت د تشکیلاتو او دندو او د اړوندو فرمانونو او قوانینو په اړه معلومات ورکړل او ګډونوالو ته یې له پیل څخه تر دېدمه د تخنیکي هیئت د فعالیتونو راپور وړاندې کړ. نوموړي د یاد هیئت د چارو پر مخ وړلو په برخه کې د سرپل ولایت له مقام او د یاد ولایت له امنیتي او استخباراتي ارګانونو څخه همکاري وغوښته.
د یادې ناستې ګډونوالو د دغه هیئت د چارو لاښه پرمخ وړلو د څرنګوالي په اړه بحث او نظرونه تبادله کړل او د امارتي ځمکو د غصب د مخنیوي په تړاو یې یوه ابلاغیه تایید او لاسلیک کړه.
په پای کې د سرپل ولایت والي او د یاد ولایت امنیه قوماندان د دغه ولایت د ځمکو د غصب د مخنیوي له تخنیکي هیئت سره خپلې هر اړخیزې همکارۍ هم اعلام کړې.
