۱۶ خیریه بنسټونو او اتحادیو د کنړ ولایت له زلزلهځپلو سره مرستې وکړې
د هېواد په ختیځو ولایتونو کې د شدیدې زلزلې په دوهمه او درېیمه ورځو کې چې ډېر تلفات او زیانونه یې اړولي، ۱۰ خیریه بنسټونو او ۶ اتحادیو او یو شمېر خيِرو اشخاصو د کنړ او ننګرهار د عدلیې ریاستونو په همغږۍ د دې پېښې له زیانمنو شویو کسانو سره مرستې وکړې.
په دغو مرستو کې د څښاک اوبه، درمل، کېږدۍ، غذايي توکې او خواړه شامل وو چې د ربیع الاول د میاشتې په ۹مه او ۱۰مه نېټه د سهشنبې او چهارشنبې په ورځو کې په کنړ ولایت او د ننګرهار په دره نور ولسوالۍ او عامې روغتيا په روغتون کې د زلزلې زیانمنو ته ووېشل شوې.
د ننګرهار او کنړ ولایتونو عدلیې ریاستونو په وېش کې د روڼتیا او د مرستو په وړاندې کولو کې د بېنظمۍ د مخنیوي په موخه په یادو ولایتونو کې د دغو مرستو د وېش له بهیر څخه څارنه وکړه.
د عدلیې وزارت یو ځل بیا په دې وزارت کې له ثبت شویو خیریه بنسټونو او اتحادیو، ملي سوداګرو او له ټولو هېوادوالو غوښتنه کوي چې د هېواد د ختیځ په وروستۍ وژونکې زلزله کې له زیانمنو شویو سره د خوراکي توکو، کالیو او سرپناه په برخو کې مرستې وکړي.
