د عدلیې وزارت لخوا په تېرې یوې میاشت کې لسګونو بېوزلو زیانمنو، شکمنو او تورنو لپاره د حقوقي مرستو وړاندې کېدل
د اسلامي امارت د عدلیې وزارت د ۱۴۴۶ هجري قمري کال د ذیالقعدې میاشتې په ترڅ کې لسګونو زیانمنو، شکمنو او تورنو ته حقوقي مرستې وړاندې کړي او د هغوی له حقوقو څخه يې په محکمو کې دفاع کړې ده.
د عدلیې وزارت د حقوقي مرستو ریاست حقوقي مساعدینو د همدې مودې په اوږدو کې د محکمو په ۷۲ قضايي ناستو کې ګډون کړی او د خپلو مؤکلینو له شرعي او قانوني حقوقو څخه یې دفاع کړې ده.
همداراز په دې موده کې ۳۵۶ ځله د بېوزلو زیانمنو، شکمنو او تورونو قضیې تعقیب شوي دي. همدارنګه، په تېره یوه میاشت کې ۱۱ تنو غوښتونکو ته وړیا قانوني او شرعي مشورې وړاندې شوي دي.
د عدلیې وزارت د حقوقي مرستو ریاست په مدني او جزائي قضیو کې بېوزلو زیانمنو، شکمنو او تورنو اشخاصو ته وړیا حقوقي مرستې وړاندې کوي او په محکمو کې د هغوی له حقوقو څخه دفاع کوي ترڅو عدالت په سمه توګه تأمین شي
