د کنړ ولایت عدلیې رئيس د یاد ولایت د معاملاتو لارښوونې او خیریه بنسټونو له مسؤولینو سره وکتل
د کنړ ولایت د عدلیې رئيس مولوي روح الله روحانی د ذیالقعدې د مياشتې په ۱۵ مه نېټه د سهشنبې په ورځ، د یاد ولایت د معاملاتو لارښوونې او خيریه بنسټونو له یو شمېر مسؤولينو سره د عدلیې رياست په مقر کې وکتل.
په دې کتنه کې د عدلیې رئيس د معاملاتو لارښوونې پر استازو ټينګار وکړ چې، له راستنېدونکو کډوالو سره د استوګنځیو د موندلو او د کورونو د کرایې په برخه کې لازمه همکاري وکړي.
همدارنګه نوموړي د خيريه بنسټونو له استازو څخه هم وغوښتل ترڅو، له راستنېدونکو کډوالو سره د عدلیې رياست په همغږۍ لازمې مرستې وکړي.
په ورته مهال په دې ناسته کې د معاملاتو لارښوونې او خیریه بنسټونو مسؤولینو هم ډاډ ورکړ چې، له راستنېدونکو کډوال سره هر اړخیزه همکاري کوي.
