د ننګرهار پوهنتون محصلینو لپاره د عدلیې رياست له لوري د زده کړییزې برنامې جوړيدل
د ننګرهار ولایت د عدليې ریاست د شوال د میاشتې په ۳۰مه نېټه د دوشنبې په ورځ، د ننګرهار پوهنتون د حقوقو او شرعیاتو پوهنځیو ۳۰ تنو محصلینو لپاره مسلکي زدهکړه ییزه برنامه جوړه کړه.
په دې برنامه کې چې د عدليې ریاست په مقر کې ترسره شوه محصلینو ته د عدليې وزارت د دندو، د جزایي قضیو د مراحلو او د مدافع وکیل د پېژندنې، اهمیت او ارزښت په اړه تفصیلي معلومات ورکړل شول.
د عدليې ریاست مسؤولینو په خپلو خبرو کې وویل چې دا ډول عملي برنامې د محصلینو د نظري زدهکړو تر څنګ، د عملي تجربو د ترلاسه کولو لپاره اغیزمنې او ګټورې دي.
په دې برنامه کې د ننګرهار پوهنتون محصلینو هم په بېلابېلو برخو کې خپلې پوښتنې مطرح کړې او د عدلیې ریاست مسؤولینو هغوی ته د قناعت وړ ځوابونه ورکړل.
