په بلخ ولایت کې د څه باندې ۸۷۶۵ جریبه ځمکو دوسیې بررسي شوې
د بلخ ولایت د ځمکو له غصب څخه د مخینوي تخنیکي هیئت ناسته د شعبان د مياشتې په ۱۳ مه نېټه د چهارشنبې په ورځ، د یاد هیئت د رئیس او غړو په ګدون جوړه شوه.
د تخنيکي هیئت په دې ناسته کې د بلخ ولایت د مزار شریف ښار په شمال ختيځ لوري کې د شهرنو ښارګوټي د اته زره دوه سوه نهه (۸۲۰۹) جریبه ځمکې، د مزار شریف ښار په لسمه ناحيه کې د دوه سوه پنځه دېرش (۲۳۵) جریبه ځمکې، په نهر شاهي ولسوالۍ کې د څه باندې دوه سوه یو ویشت (۲۲۱) جریبه ځمکې او د چمتال ولسوالۍ په تګابي امام صاحب کلي کې د سل (۱۰۰) جریبه ځمکو دوسیې تر بحث او بررسي لاندې ونيول شوې.
هيئت پرېکړه وکړه چې د یادو دوسیو په اړه دې املاکي څېړنې ترسره شي.
همدارنګه په دې ناسته کې د بلخ په بیلابیلو ساحو کې د ځمکو د غصب اړوند یو شمېر نورې دوسیې هم بررسې شوې او په اړه یې لازم تصاميم ونيول شول.
