د هېواد ۳۴ ولایتونو د حقوقي مرستو آمرینو لپاره زده کړه ییزه برنامه جوړیدل
د اسلامي امارت د عدلیې وزارت د مرکز او د هېواد ۳۳ نورو ولایتونو د عدلیې ریاستونو د حقوقي مرستو آمرینو او یوشمېر کارکوونکو لپاره د «اداري او مسلکي زده کړې» زده کړه ییزه برنامه جوړه کړه.
دا برنامه چې په افغانستان کې د ناروي د کډوالو شورا (NRC) د دفتر په همکارۍ او د عدلیې وزارت سره د دغې موسسې د تفاهم پر بنسټ جوړه شوې ده، د جماديالثاني د میاشتې په ۵مه نېټه د شنبې په ورځ د عدلیې وزارت د بېلابېلو برخو د رئیسانو او مسؤولینو او په افغانستان کې د ناروي د کډوالو شورا د دفتر د سرپست په ګډون سره، د یو لړ مراسمو په ترڅ کې پرانیستل شوه.
په دې برنامه کې د عدلیې وزارت د کارکوونکو د چارو رئیس، محترم مفتي رحمت الله حلیم د کارکوونکو د ظرفیت لوړولو او مسلکي کولو لپاره زده کړه ییزې برنامې مهمې وبللې او ګډونوالو ته یې په کاري چارو کې د خپلو زده کړو د تطبیق په برخه کې لازمې توصیې وکړې.
په دې برنامه کې د عدلیې وزارت د بهرنیو اړیکو رئیس، محترم مولوي ضیاءالحق ثاقب هم په خپلو خبرو کې په کاري چارو کې د کارکوونکو پر اخلاص او نیک نیت او د چارو په ښه ترسره کولو ټینګار وکړ. نوموړي ګډونوالو ته په خطاب سره وویل چې د اسلامي امارت نظام په اخلاص او فداکاریو رامنځته شوی او اوسمهال په کاري چارو کې دغه ډول اخلاص ته اړتیا ده.
د عدلیې وزارت د کارکوونکو چارو او د بهرنیو اړیکو رئیسانو په خپلو خبرو کې په افغانستان کې د ناروي د کډوالو شورا د دفتر له همکارۍ او له عدلیې وزارت سره د دغې موسسې د همکارۍ تفاهمنامې د سم تطبیق له امله قدرداني وکړه.
په افغانستان کې د ناروي د کډوالو شورا د دفتر عملیاتي رئیس او سرپرست، محترم محمد قاسم بړيڅ هم په دې برنامه کې وینا وکړه او له عدليې وزارت سره د یادې موسسې د همکاریو پر دوام یې ټینګار وکړ. دغه راز نوموړي وویل چې دا موسسه د عدلیې وزارت کارمندانو لپاره د نورو زده کړه ییزو برنامو ترسره کولو ته ژمنه ده.
ټاکل شوې ده چې د «اداري او مسلکي زده کړې» زده کړه ییزه برنامه تر ۶ ورځو پورې دوام وکړي او د هېواد د ۳۴ ولایتونو د حقوقي مرستو آمرین به پهکې خلکو لپاره د خدمتونو په وړاندې کولو کې د آسانتیاو د پیاوړي کولو په موخه، د لازمو مواردو زده کړې ترسره کړي.
