په سمنګان ولایت کې د نږدې ۱۷۰ جریبه ځمکې تثبیت
د سمنګان ولایت د ځمکو له غصب څخه د مخنیوي تخنیکي هیئت ناسته، د جمادی الأولی د میاشتې په ۱۱ مه نېټه د چهارشنبې په ورځ، د یاد هیئت د رئیس او غړو په ګډون ترسره شوه.
په دې ناسته کې د یاد ولایت په بېلابېلو برخو کې د کابو یو سلو دوه اتیا (۱۸۲) جریبو ځمکو دوسیې تر بحث او بررسۍ لاندې ونیول شوې.
تخنیکي هیئت په دې ناسته کې د یاد ولایت په کوز دره صوف ولسوالۍ کې د څړځای یو سلو اویا (۱۷۰) جریبه ځمکه امارتي تثبیت کړه او پرېکړه یې وکړه چې د یادې ځمکې دوسیه دې د مراحلو له تېرولو څخه وروسته مرکزي کمېسیون ته واستول شي.
دغه راز په یاده ناسته کې د سمنګان روی دو آب ولسوالۍ کې د نږدې دولس (۱۲) جریبه نورې ځمکې دوسیې په اړه هم بحث وشو او په هکله یې لازم تصمیم ونیول شو.
