د عدلیې وزارت مسلکي معين د لغمان ولایت له والي سره وکتل
د عدلیې وزارت د مسلکي معين، محترم شيخ الحدیث مولوي عبدالکريم حيدر په مشرۍ، ولایتونو ته د یاد وزارت د پلاوي د سفرونو په لړ کې، دغه پلاوي د جمادی الأولی د میاشتې په ۴ مه نېټه د چهارشنبې په ورځ، لغمان ولایت ته سفر وکړ او د یاد ولایت له سیمه ییزو مسؤولینو سره یې وکتل.
مؤظف پلاوي د دغه سفر په ترڅ کې د لغمان له والي سره وکتل او د یاد ولایت د عدلیې له ریاست سره یې د ولایت د مقام او نورو سیمه ییزو ادارو پر همکارۍ ټینګار وکړ.
د عدلیې وزارت پلاوي د دغه سفر په ترڅ کې د لغمان ولایت له عدلیې ریاست څخه هم لیدنه وکړه او خلکو ته، د دغه رياست د خدمتونو وړاندې کول یې له نږدې بررسي کړل.
دغه راز د عدلیې وزارت مسلکي معین او له هغه سره مل پلاوي د لغمان ولایت، عدلیې ریاست له کارکوونکو او مسؤولینو سره په کتنه کې، هغوی ته د چارو ښه پرمخ وړلو او خلکو ته د خدمت کولو په برخه کې توصیه وکړه او په دې هکله یې لازمې لارښوونې وکړې.
مؤظف پلاوي د لغمان ولایت د عدلیې ریاست د کارکوونکو د فعالیت د څرنګوالي په بررسۍ سره، د کاري نیمګړتیاو لرې کولو په برخه کې هم هغوی ته لازمې توصیې وکړې.
