د یوې میاشتې په اوږدو کې په ۱۰ ولایتونو کې د نږدې ۱۲۰ زره جریبه امارتي ځمکې استرداد
د ځمکو د غصب د مخنیوي تخنیکي هیئتونو د ۱۴۴۵ هجري قمري کال د شعبان د میاشتې په اوږدو کې د هېواد په ۱۰ ولایتونو کې څه باندې ۱۱۹ زره او ۶۶۱ جریبه امارتي ځمکه له بررسۍ او تثبیت څخه وروسته، استرداد کړه او هغه یې اړوندو ادارو ته تسلیم کړه.
د تېرې یوې میاشتې په ترڅ کې تر ټولو زیاتې استرداد شوې ځمکې په کندهار، بدخشان او میدان وردک ولایتونو کې موقعیت لري چې نږدې ۱۱۳ زره جریبه ځمکه په کې شامله ده.
دغه راز د ځمکو د غصب د مخنیوی تخنیکي هیئتونو د یادې میاشتې په اوږدو کې کابو ۲۳۶ زره او ۷۹۵ جریبه امارتي ځمکه د افغانستان په ۲۰ ولایتونو کې تثبیت کړې او څه دپاسه ۳۲۷ زره او ۶۴۸ جریبه نوره ځمکه هم په ولایتونو کې تر بررسۍ لاندې نیولې ده.
د امارتي ځمکو د بررسۍ، تثبیت او استرداد بهیر په ټولو ولایتونو کې دوام لري او د غصب شویو زرګونو جریبو امارتي ځمکو دوسیې، د ځمکو د غصب د مخنیوي کمېسیون او په ولایتونو کې د یاد کمېسیون د تخنیکي هیئتونو تر بررسۍ لاندې دي.
