د هرات عدليې رياست کارمندانو لپاره زده کړه ييزه برنامه جوړېدل
د عدليې وزارت د بشري سرچينو رياست د هرات ولایت د عدلیې رياست کارمندانو ته د «امارت د قضاياو مسلکي او ادارې زده کړې» تر سرليک لاندې شپږ ورځنۍ زده کړه ييزه برنامه د یاد ریاست په مقر کې جوړه کړه.
د یادې زده کړه ییزې برنامې پرانیسته کې چې د شعبان د میاشتې په ۱۹ نېټه د شنبې په ورځ جوړه شوه، د هرات ولایت د عدلیې رئیس مولوی یار محمد خادمي، د عدلیې وزارت د بشري سرچینو ریاست د زده کړو او ظرفیت لوړولو آمر مفتي احمد ضیا خبیب، ښوونکو او نورو مسؤولینو حضور درلود.
د هرات ولایت د عدلیې رئیس د خپلې وینا په ترڅ کې، د عدليې رياست کارکوونکو ته د دا ډول سيمنارونو جوړولو څخه خوښي څرګنده کړه او راتلونکې کې هم د ورته برنامو جوړولو غوښتنه یې وکړه.
له بلې خوا د عدلیې وزارت د بشري سرچینو ریاست د زده کړو او ظرفیت لوړولو آمر هم په دې برنامه کې د زده کړه ییزو برنامو د اغیزمنتوب، ګټورتوب او اهمیت په تړاو خبرې وکړې. نوموړي له ګډونوالو څخه وغوښتل چې د دغې برنامې زده کړې په دوامداره توګه تعقیب کړي او د برنامې له پای څخه وروسته، په خپلو کاري چارو کې ورځني ګټه پورته کړي.
په دې زده کړه ییزې برنامه کې چې تر شپږو ورځو پورې دوام لري، د هرات ولایت د عدلیې ریاست ۲۷ تنو مسلکي کارمندانو لپاره د ځمکو له غصب سره د مبارزې د حل لارو، د ځمکو د غصب د مخنیوي قانون، دعوا او د هغې ډولونو، اداري مرسلاتو او پلان جوړونې په هکله به لازمې زده کړې وړاندې شي.
