په کندز ولایت کې د ۲۷۰ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د ربیع الثاني د میاشتې په ۲۸ نېټې د یکشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په یاده ناسته کې، د امام صاحب ولسوالۍ د قلم ګذر ساحې د ۲۶۰ جریبه ځمکې دوسیې، د علي آباد ولسوالۍ د شغنیانو ساحې د ۱۰ جریبه ځمکې دوسیه او د ارباب رمضاني ساحې د ۷ بسوې ځمکې دوسیه بحث او بررسۍ لاندې ونیول شوې او یادې شوې ځمکې د هغو د متصرفینو د لیکل شوي اعتراف له اخیستو څخه وروسته امارتي تثبیت او استرداد شوې.
هیئت لارښوونه وکړه چې د دغو ځمکو غیرشرعي ذوالیدونو ته د هغو د اجارې ورکول بهیر له پړاوونو څخه تېر شي.
دغه راز په یاده ناسته کې، د ګلتپې ولسوالۍ د خروټو ساحې د ۷ جریبه ځمکې دوسیه بحث او بررسۍ لاندې نیول شوې او امارتي تثبیت شوه او په دغې برخه کې لازمې لارښوونې صادر شوې.
د امام صاحب ولسوالۍ د تویچي ساحې د ۵۸ جریبه ځمکې دوسیه هم په یاده ناسته کې بحث او بررسۍ لاندې ونیول شوه او له تخنیکي هیئت څخه یو ټیم توظیف شو ترڅو د متصرفینو سندونه پر ساحې باندې تطبیق کړي او راپور یې وړاندې کړي.
