په کابل ښار کې د معاملاتو د لارښوونې او د موټر پلورنځۍ ۲۶ دفترونه مهرلاک او وتړل شول
د عدلیې وزارت د معاملاتو د لارښوونې او عریضه لیکونکو د چارو ریاست د خلکو د دوکه کولو، د سرګردانۍ او د افرادو او اشخاصو له خوا د غیرقانوني فعالیتونو د مخنیوي او د ملي عوایدو د کچې لوړولو په منظور، د تېرې یوې میاشتې په اوږدو کې د کابل ښار په ۱۵ ناحیې کې د معاملاتو د لارښوونې له ۱۹۳ دفترونو او ۵۴ موټر پلورنځیو څخه لیدنه او نظارت ترسره کړ.
د دغې بررسۍ په پایله کې د معاملاتو د لارښوونې ۱۵ دفترونه او ۱۱ موټر پلورنځۍ د جواز نه درلودلو، د جواز د نیټې پای ته رسیدلو، په جعلي سټو کې د معاملي او د ځینو له خوا یې د نمایندګې جوړولو په اساس، مهرلاک او وتړل شوې.
دغه ریاست د یادو شویو د معاملاتو د لارښوونې او د موټر پلورنځیو د دفترونو مالکانو ته توصیه وکړه چې ژر تر ژره د فعالیت جواز په اخیستلو اقدام وکړي او په راتلونکي کې له غیرقانوني فعالیتونو څخه ډډه وکړي.
