د کابل ښار په دهمزنګ ساحې کې د یو شمېر عریضه لیکونکو د فعالیتونو بررسي او نظارت
د عدليې وزارت د انسجام لوی ریاست نظارتي هیئت د یاد ریاست د لوی رئیس مولوي عبدالصمد عمري په مشرۍ د ربیع الاول د میاشتې په ۱۳ نېټې د پنجشنبې په ورځ د کابل ښار په دهمزنګ ساحې کې د یو شمېر عریضه لیکونکو له فعالیتونو څخه بررسي او نظارت ترسره کړ.
یاد هیئت د کابل ښار په دهمزنګ ساحې کې د یو شمېر عریضه لیکونکو د غیرقانوني فعالیت له امله د یو شمېر عریضه لیکونکو او موټر پلورونکو د شکایت په اساس، په دغې ساحې کې د ۲۰۰ عریضه لیکونکو د فعالیت له څرنګوالي څخه بررسي او نظارت ترسره کړ.
د بررسۍ په ترڅ کې مشخصه شوه چې د دغې ساحې یوازې ۳۰ سلنه عریضه لیکونکي رسمي جواز لري او د هغو پاتې ۷۰ سلنه نور له رسمي جواز څخه پرته په غیر قانوني ډول فعالیت ترسره کاوه او دغه راز له یو شمېر عریضه لیکونکو څخه د موټر پلورلو سټې هم ترلاسه شوې.
یاد هیئت په دغې ساحې کې د غیرقانوني عریضه لیکونکو دفترونه وتړل او مهرلاک کړل او د هغو متصدیانو ته لارښوونه وشوه چې له غیرقانوني فعالیت څخه ډډه وکړي او د رسمي جواز اخیستلو په موخه د عدلیې وزارت د انسجام لوی ریاست ته مراجعه وکړي.
