د کاپیسا ولایت په تګاب ولسوالۍ کې د امارتي ځمکو له غصب څخه مخنیوی وشو
د کاپیسا ولایت د ځمکو د غصب د مخنیوی تخنیکي هیئت د ذوالقعدې میاشتې په ۱ نېټه د یکشنبې په ورځ د دغه ولایت تګاب ولسوالۍ ته ولاړ او د ځمکو د غصب د مخنیوي او د غصب شویو ځمکو د استرداد په برخه کې لازم اقدامات ترسره کړل.
د تګاب ولسوالۍ په بېلابېلو ساحو کې خلکو د امارتي تثبیت شویو ځمکو پر غصب او د تاسیساتو پر جوړلو یې په کې لاس پورې کړي وو.
تخنیکي هیئت د امارتي مسؤولینو په ملتیا د تعمیر بازار له سیمې او کرم خیل، شیرخیل، سرګینان، عمرخیل، خوشحال خیل او آخندزاده ګانو له کلیو څخه لیدنه وکړه او پر امارتي ځمکو په خپل سر ډول ناقانونه جوړې شوې څلور دیوالۍ او نور تاسیسات يې ویجاړ کړل. یاد هیئت د ساحې پر اوسیدونکو ټینګار وکړ چې د ساحې له بیاځل غصب څخه ډډه او مخنیوی وکړي.
یاد شوي هیئت استرداد شوې امارتي ساحې د ولسوالۍ سیمه ییزو مسؤولینو ته وسپارلې ترڅو له قانون سره سم ترې ګټه پورته کړي او له غصب څخه يې مخنیوی وکړي.
