په ارزګان ولایت کې ۸ موټر پلورنځي د غير قانوني فعاليت له امله وتړل شول
د ارزګان ولایت د عدلیې رياست نظارتي پلاوي د جمادیالثانی د مياشتې په ۲۳مه نېټه د یکشنبې په ورځ د دغه ولایت په مرکز، ترينکوټ ښار کې له ۲۱ موټر پلورنځيو څخه نظارت ترسره کړ.
د دغه نظارت په ترڅ کې چې د ارزګان عدلیې رئيس، مولوي خيرالله حق نما په مشرۍ ترسره شوه د یادو موټر پلورنځيو قانوني جوازونه، رسمي سټې، لوحې، د ثبت کتابونه، د پېر او پلور قانونيتوب او یو شمېر نور اړین اسناد بررسي شول.
د یاد نظارت په ترڅ کې ۸ موټر پلورنځي د یو شمېر غير قانوني فعاليت له امله وتړل شول او د پاتې نورو موټر پلورنځيو مسؤولينو ته د کاري چارو د ښه پرمخ وړولو او د خپلو موجودو ستونزو د لرې کولو په موخه لازمې توصیې وشوې.
د ارزګان ولایت د عدلیې ریاست په دوامداره توګه په دغه ولایت کې له اړوندو برخو څخه نظارت ترسره کوي تر څو د غير قانوني فعاليتونو مخنيوی وکړي.
