نیمروز او غزني ولایتونو کې نږدې ۱۶۰۰ جریبه ځمکه امارتي تثبیت شوه
د نیمروز او غزني ولایتونو د ځمکې د غصب د مخنیوي تخنیکي هیئتونو دغو ولایتونو کې د ځینو غصب شویو ساحو په بررسۍ او لیدنې سره، نږدې ۱۶۰۰ جریبه ځمکې امارتي تثبیت کړې.
د نیمروز ولایت تخنیکي هیئت د زرنج ښار اړوند مالداران کلي ته ولاړ او د کادستري نقشو او سندونو له بررسۍ څخه وروسته يې، ۲۹۷ جریبه ځمکه امارتي تثبیت کړه.
یاد شوي هیئت د ځمکې د غصب د مخنیوي له پاره لازم تصمیمونه ونیول او مسوولینو ته يې لارښوونه وکړه چې تثبیت شوې ساحې خط اندازې کړي.
په همدې حال کې د غزني ولایت د ځمکې د غصب د مخنیوي تخنیکي هیئت د خواجه عمري ولسوالۍ قلعه قربان ساحې ته ولاړ او ۱۳۰۲ جریبه ځمکه يې امارتي تثبیت کړه او د هغې له غصب څخه یې مخنیوی وکړ.
یاده ځمکه ۴۸ کادستري قطعې اړوند ده او د خواجه عمري ولسوالۍ او د غزني ولایت د مرکز په صفري نقطې کې موقعیت لري.
