زابل ولایت کې دوې موټر پلورنځۍ د غیرقانوني فعالیتونو په دلیل وتړل شوې
د زابل ولایت د عدليې ریاست موظف هیئت ددغه ریاست د انسجام د بررسۍ او جوازونو مدیر او حقوقي مرستندوی په ګډون ددغه ولایت په مرکز کې د موټورو له پلورنځیو څخه، لیدنه او نظارت وکړ.
یاد شوي هیئت ددغې لیدنې په ترڅ کې دغه ښار کې له ۲۴ موټر پلورنځیو څخه لیدنه او نظارت وکړ چې له دغې جملې څخه ۲۲ د موټرو پلورنځیو د فعالیت جواز درلود او د عدليې وزارت د انسجام لوی ریاست له اصولو سره سم يې فعالیت کوي. خو ۲ نورو موټر پلورنځیو چې د فعالیت جواز یې نه درلود او په غیر قانوني صورت یې فعالیت درلود، د یاد هیئت لخوا مهرلاک او وتړل شوې.
د زابل ولایت د عدليې ریاست مسوولین هڅه کوي ترڅو ددغه ولایت اوسیدونکو له پاره غوره او په وخت چوپړتیاوې وړاندې کړي او هیچا ته اجازه ور نه کړي ترڅو له جواز څخه پرته او په غیر قانوني ډول فعالیت وکړي.
