د لغمان او کندهار ولایتونو د تخنیکي هیئتونو ناستې جوړې شوې

د لغمان او کندهار ولایتونو د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او یادو شوو ولایتونو کې د غصب شوو ځمکو په اړه پکې بحث او د نظر تبادله وشوه.

د لغمان ولایت د تخنیکي هیئت ناسته کې په R2 ساحې کې د صنعتي پارک د ۲۹۲ جریبه غصب شوې ځمکې په اړه بحث وشو او ټینګار یې وکړ چې د مرکزي کمېسیون له لارښوونې سره سم، په دغې ساحه کې د غاصبینو او د هغوی د ودانیو د ډول لړلیک مشخص شي. دغه راز پریکړه وشوه چې د لغمان ولایت د پیژندل شوو غاصبینو شهرت په یو جدول کې جوړ او مرکزي کمېسیون ته واستول شي.

دغه راز هیئت د قرغه يي ولسوالۍ د صفوخیل ساحې د ۱۲۴.۵۵ جریبه ځمکې، د سرخکان ساحې د ۱۷۵ جریبه ځمکې، د جبار خیل قوم په تصرف کې د ۲۸۰ جریبه ځمکې او د بدني روزنې د آمریت د ۷۰ جریبه غصب شوې ځمکې په اړه هم بحث وکړ او د هغې د تثبیت او استرداد په اړه یې لازم تصمیمونه ونیول.

د سرخکان د ۱۷۵ جریبه غصب شوې ساحې په اړه پریکړه وشوه چې هیئت راتلونکي ورځ ساحې ته ولاړ شي او له غاصبینو څخه قانوني سندونه وغواړي.

په همدې حال کې، د کندهار ولایت د تخنیکي هیئت په ناسته کې د میرویس مېنې ساحه کې د یو جومات غصب شوې ځمکې، د پنځمې ناحیې په ظریفي مېنې ساحه کې د کانال د حریم او د دولتي ځمکې د غصب په اړه بحث او د نظر تبادله وشوه.

دغه راز په یاده شوې ناسته کې، د صنعتي پارک، د آریانا افغان هوايي شرکت او د راتلونکي کال د کاري پلان د موضوعاتو په اړه بحث وشو.

په یاده شوې ناسته کې، نیش ولسوالۍ کې ددوو کلونو د ویشلو په اړه هم بحث وشو او هیئت تعیین شو ترڅو معلومات راټول او له تخنیکي هیئت سره شریک کړي.