غزني او کندز ولایتونو کې څه دپاسه ۲۳۵۰۰ جریبه ځمکه امارتي تثبیت شوه
د غزني او کندز ولایتونو د ځمکې د غصب د مخنیوی تخنیکي هیئتونو یادو ولایتونو کې د ځینو برخو په لیدنې او بررسۍ سره شاوخوا ۲۳۵۳۵ جریبه ځمکه امارتي تثبیت کړه.
د غزني ولایت تخنیکي هیئت ددغه ولایت په مرکز کې د ځینو ساحو په لیدلو او بررسۍ سره ۱۹۰۳۵ جریبه ځمکه امارتي تثبیت کړه. یاده ځمکه د ۳۶ کادستري قطعې اړوند ده چې د غزنې ولایت د مرکز او ددغه ولایت د واغظ ولسوالۍ ترمنځ موقعیت لري.
ددغې ځمکې په تثبیت سره یاد ولایت کې د تثبیت شوو امارتي ځمکو مجموعه، ۸۰۳۹۷ جریبه ځمکې ته رسیږي چې د تخنیکي هیئت په هڅو سره یې له غصب څخه مخنیوی شوی دی.
په همدې حال کې د کندز ولایت تخنیکي هیئت ددغه ولایت دشت ارچي ولسوالۍ ته ولاړ او له سیمه ییزو خلکو سره يې وکتل. یادشوې هیئت هغوی ته د شریعت له نظره د غصب، د امیرالمومنین حفظه الله فرمان او د ځمکې د غصب د مخنیوي د مقررې په اړه، معلومات وړاندې کړل.
ځايي خلکو خپلې ستونزې له تخنیکي هیئت سره شریکې کړې او د هیئت د همکارۍ غوښتنونکي شول. دغه راز هغوی ژمنه وکړه چې له هیئت سره به همکارۍ وکړي.
یاد شوي هیئت د دشت ارچي ولسوالۍ د داويانو او صوفيانو کلیو له غصب شوو ساحو څخه لیدنه او بررسي ترسره کړه او کابو ۴۵۰۰ جریبه ځمکه يې دغو کلیو کې امارتي تثبیت کړه.
هیئت پر دغو ځمکو جوړ شوي دیوالونه ویجاړ کړل او پر ځايي خلکو یې ټینګار وکړ چې د کمېسیون تر پریکړې پورې دغو ساحو کې د دیوالونو له جوړولو څخه ډډه وکړي.
