ننګرهار ولایت کې ۱۰۰ جریبه ځمکه امارتي تثبیت شوه
د ننګرهار ولایت د ځمکې د غصب د مخنیوي کمېسیون تخنیکي هیئت د دوو تېرو ورځو په لړ کې ددغه ولایت په مهمند درې ولسوالۍ کې ۱۰۰ جریبه ځمکه چې د یو شخص لخوا په غیر قانوني ډول تصرف شوې وه، امارتي تثبیت کړه او یاده ځمکه اسلامي امارت ته وسپارل شوه.
دغه راز یاد هیئت د جلال آباد ښار له شهر کهنه څخه لیدنه وکړه. په دغه ښار کې د عبدالله بن جابر د جومات ملکیت له ختیځ او لویدیځ خوا د خلکو لخوا غصب شوې او د جومات تر شاوخوا د خلکو لخوا پخپلسر کورونه جوړ شوي دي. دغه سیمه د ابتدایه او مرافعه محکمې د حکم پر اساس د اسلامي امارت په ګټه فیصله شوې ده او د هغه د جوړولو کارونه به ډېر ژر پیل شي.
په همدې حال کې، د پکتیکا ولایت د تخنیکي هیئت ناسته ددغه هیئت د رییس او غړو په حضور سره جوړه شوه او په هغې کې د ښرنې ښار د ډب غاړې ځمکې، د خیرکوټ ولسوالۍ د کټه سنګ ځمکې او یوسف خیل ولسوالۍ کې د دریو اشخاصو د ځمکې په اړه بحث او په دغې برخه کې لازم تصمیمونه ونیول شول.
دغه راز په دغې ناسته د ځینو اشخاصو عریضې چې تخنیکي هیئت ته وړاندې شوې وې، بررسي شوې.
پر دې سربېره، د کابل ولایت د تخنیکي هیئت ناسته ددغه هیئت د رییس او غړو په حضور سره جوړه شوه او په چټکتیا سره د کارونو اجرا او د مقاماتو د لارښوونو پر عملي کولو بحث او خبرې وشوې. په دغې ناسته کې د لګښتونو پر کنټرول، د تېرې اوونۍ د راپور جوړولو او د ځمکې د غصب د مخنیوي کمېسیون ته یې د استولو په اړه هم ټینګار وشو.
دغه راز په دغې ناسته کې د راتلونکې اوونۍ له پاره د کاري پلان پر جوړولو او د بررسۍ له پاره د مهمو سیمو ټاکلو، په اړه بحث او د نظر تبادله وشوه.
