څلورو ولایتونو کې د ځمکې د غصب د مخنیوي د تخنیکي هیئتونو د غونډو جوړیدل او د عملي کارونو پیلېدل
د دوو تېرو ورځو په لړ کې د هلمند، دایکندي، میدان وردک او کاپیسا ولایتونو کې د غصب د مخنیوي او د غصب شوو ځمکو د تشخیص او تثبیت تخنیکي هیئتونو خپل غونډې او عملي کارونه پیل کړي او په دغو ولایتونو کې يې له غصب شوو سیمو او ځمکو څخه لیدنه وکړه.
د هلمند ولایت د ځمکې د غصب د مخنیوي تخنیکي هیئت خپله ناسته ترسره کړه او د لښکرګاه ښار د بولان سیمه کې یوه قطعه ځمکه چې یو شخص یې د مالکیت ادعا لري، لیدنه وکړه.
ددغې سیمې مساحت ۲۵۰ جریبه دی چې ۱۱۵ جریبه يې جوړه شوې او پاتې برخه کې یې پخپلسره کورونه جوړ شوي دي. دغه ځمکه د یاد هیئت لخوا له نقشې سره تطبیق شوه او پایله کې یې مشخصه شوه چې دغه ځمکه امارتي ده. یاد شوی شخص ادعا لري چې دغه سیمه د جمهوریت دوره کې د درې محکمو لخوا هغه ته سپارل شوې ده. له یاد شخص څخه سندونه او مدارک وغوښتل شول چې د اړوند کمېسیون لخوا بررسي شي.
د دایکندي ولایت تخنيکي هیئت د هغو اشخاصو د سندونو د بررسۍ کار پیل کړ چې په بغده مرده سیمه کې یې شاوخوا ۱۱ جریبه ځمکه غصب کړې وه. د نیلي ښار د ماسټر پلان د غصب شوو سیمو د بررسۍ کار هم د اړوند تخنیکي ټیم لخوا پیل شو. دغه راز د کرنې ریاست د سروې ټیم په ۸ ولسوالیو کې د غصب شوو بکر او شاړو سیمو څخه د بررسۍ په غرض خپل کار پيل کړ.
د میدان وردک ولایت د تخنیکي هیئت غونډه جوړه شوه او په کې د ولسوالیو د تخنیکي کمېټې ترکیب مشخص شو.
دغې کمېټې کې د حج او اوقافو، کرنې، څارنوالۍ، حقوقو، ښاروالۍ او مستوفیت مدیران شامل دي. ددغې کمېټې مشرتابه د ولسوالۍ د امنیه قوماندان پرغاړه لري.
یاد هیئت د میدان ښار په کوته عشرو سیمه کې د یوې قطعې امارتي ځمکې څخه لیدنه وکړه او ددغې سیمې له خلکو سره یې وکتل او د غصب د مخنیوي په اړه یې معلومات ورکړل.
د کاپیسا ولایت تخنیکي هیئت د غصب شوو ځمکو د بررسۍ په منظور د کوهستان حصه اول ولسوالۍ ته سفر وکړ او له سیمه ییزو مقاماتو سره یې وکتل. یاد هیئت ددغې ولسوالۍ امارتي مقاماتو او اوسیدونکو ته د ځمکي د غصب د مخنیوي او د غصب شوو ځمکو د استرداد د مقررې او د امیرالمومنین حفظه الله فرمان تشریح کړ.
یاد هیئت پریکړه وکړه چې د کوهستان د حصه اول غصب شوې ځکمې له کروکي سره په دقیق ډول تثبیت او غاصب یې وپېژندل شي او د غصب شوو ځمکو د استرداد له پاره اقدام وشي.
ګډونکوونکو په غې کتنه کې یاد هیئت ته د ځمکي د غصب د مخنیوي او د غصب شوو ځمکو د استرداد په برخه کې د هر ډول همکارۍ ډاډ ورکړ.
