د کابل ښار د موټر پلورونکو له استازو سره د عدلیې وزارت د انسجام لوی رئیس لیدنه
د افغانستان اسلامي امارت د عدلیې وزارت د انسجام لوی رئیس مولوي احسان الله وثیق، د ۱۴۰۰ د کب په ۲۹ مه د یکشنبې په ورځ، د کابل ښار د موټر پلورونکو له یو شمېر استازو سره ولیدل.
د دې ناستې موخه په کابل ښار کې د موټر پلورونکو د ستونزو او ننګونو څېړنه وه.
د عدلیې وزارت د انسجام لوی رئیس، د دې ناستې ګډونوال نیکۍ او تقوا ته راوبلل او له هغوی څخه وغوښتل تر څو په خپل کار رېښتوني وي او د شریعت او الهي قانون په رڼا کې فعالیت وکړي.
په دې ناسته کې په عمده مسایلو باندې لکه کمیشن( د موټر پلورونکو د حق الامتیاز)، مالیاتو، د موټر پلورنې لپاره د ځانګړي ځای او له جواز پرته د موټر پلورنو له فعالیت څخه د مخنیوی په اړه بحث وکړ او نظرونه یې تبادله کړل.
په پای کې، د موټر پلورنو استازو ژمنه وکړه چې د اسلامي امارت ټول قوانین او مقررات به رعایتوي او د خدمت رسونې په برخه کې به د افغانستان ځورېدلي او کړېدلي ملت ته صادقانه هڅه وکړي.
