۲۰ تنو غوښتونکو ته، د معاملاتو د لارښوونې د فعالیت جوازلیکونه وویشل شول
د عدليې وزارت د انسجام عمومي ریاست د معاملاتو د لارښوونې او عریضه لیکونکو چارو ریاست د ۱۴۴۶ هجري قمري کال د محرم الحرام د میاشتې په ۱۵ نېټه د یکشنبې په ورځ یو شمېر غوښتونکو ته، د معاملاتو د لارښوونې د فعالیت جوازلیکونه وویشل.
په هغو مراسمو کې چې په همدې مناسبت په عدلیې وزارت کې جوړ شوي وو، د الله تعالی د سپیڅلي کلام د څو آیاتونو په تلاوت سره پیل شول او د عدليې وزارت د انسجام عمومي رئیس، مولوي حافظ عبدالصمد عمري او د یاد وزارت نورو مسؤلینو په کې ګډون درلود.
په دغو مراسمو کې، د معاملاتو د لارښوونې د فعالیت جواز غوښتونکو ته له دې دندې او د هغوی له مکلفیتونو سره د لازیاتې پېژندګلوۍ په منظور پوهاوی او لازم معلومات ورکړل شول او ۲۰ تنو غوښتونکو ته، د معاملاتو د لارښوونې د فعالیت جوازلیکونه، وویشل شول.
