کندز ولایت کي۳ زره جریبه ځمکه امارتي تثبیت شوه
د کندز ولایت د ځمکې د غصب د مخنیوي کمېسیون تخنیکي هیئت دغه ولایت کې له ځینو سیمو څخه لیدنه وکړه او زرګونه جریبه ځمکه یې امارتي تثبیت کړه.
یاد هیئت ددغه ولایت د امام صاحب په ولسوالۍ کې له ۳ زرو جریبو څخه زیاته ځمکه بررسی او امارتي یې تثبیت کړه. د یادې ځمکې زیاته برخه کرنیزه ځمکه وه او د هغې ځینو برخو کې کورونه جوړ شوي دي. د یادې ۳ زره جریبه ځمکې څخه ۱۵۰۰ جریبه یې خالصه امارتي او پاتې ۱۵۰۰ جریبه يې د ځینو اشخاصو لخوا د مالکیت تر ادعا لاندې ده چې د هغوی سندونه راټول او تر بررسۍ لاندې دي.
دغه راز یاد هیئت د سپین زر تصدۍ له متصرفینو سره وکتل او د هغوی ستونزې یې واورېدې.
په همدې حال کې، د فراه ولایت د تخنیکي هیئت ناسته ددغه هیئت د رییس او غړو په حضور سره جوړه شوه او پکې د ځمکې د غصب د مخنیوي په اړه بحث وشو او ددغه ولایت د مرکز له غلامان سیمې څخه د عملي اقداماتو پر پیل پریکړه وشوه.
دغې ناسته کې د زیاتو مصرفونو پر مخنیوي، سیمو کې د هیئت پر حضور او د سندونو او مدارکو پر ټولولو ټینګار وشو.
پر دې سربېره، د پکتیکا ولایت تخنیکي هیئت ناسته هم ددغه هیئت د رییس او غړو په حضور سره جوړه شوه او د تېرې یوې میاشتې راپور بیا وکتل شو.
دغې ناسته کې، د پیل شوو کارونو پر بشپړېدو، د کرنې ریاست لخوا د تثبیت شوو ځمکو د اجارې ورکولو بهیر تېرولو، د چارو پر چټکتیا او مرکز کې بررسیو ته لومړیتوب ورکړلو باندې ټینګار وشو.
دغې ناسته کې، د ټولو کادستري نقشو پر حاضرولو او له هغو سره سم د امارتي ځمکو پر معلومولو پریکړه وشوه.
د دایکندي ولایت د تخنیکي هیئت ناسته هم د یاد هیئت رییس او غړو په حضور جوړه شوه او پکې د یو شخص سندونه چې زنبور خان سیمه کې د کرنې ریاست اړوند پر ۴۰ جریبه ځمکې د مالکیت ادعا لري، تعیین شو.
دغې ناسته کې، پریکړه وشوه چې بغده مرده سیمې په تړاو د اشخاصو سندونه او ددغې موضوع راپور کمېسیون ته وړاندې شي. دغه راز پریکړه وشوه چې ګرګ کشته دوسیې په اړه بیا ځل معلومات وغوښتل شي او د چو او سل بستر روغتون شا ته د سیمې په اړه له خلکو او د ځمکې آمریت څخه لا زیات تحقیقات ترسره شي.
دغې ناسته کې یو هیئت د ښاروالۍ پلان شوې سیمې دقیق مساحت سنجش او بررسۍ په منظور تعیین شو او ۱۲ قطعې لاس نه خوړل شوې ځمکې د ځمکو د آمریت لخوا تخنیکي هیئت ته معرفي شوې وې، هم بررسي شي.
