پکتیکا ولایت کې څه دپاسه ۵۵۷۳ جریبه ځمکه امارتي تثبیت شوه
د پکتیکا ولایت د ځمکې د غصب د مخنیوي تخنیکي هیئت د والي د مرستیال په ملتیا د یاد ولایت اومنه ولسوالۍ ته ولاړ او دغې ولسوالۍ کې يې ۵۵۷۳.۵ جریبه امارتي ځمکه تشخیص او تثبیت کړه.
یاد هیئت او د والي مرستیال پارک ته نږدې د دښتې له ساحې څخه چې له اومنه ولسوالۍ، یوسف خیل او د پکتیکا له مرکز سره وصل دي، لیدنه وکړه او د یادې ځمکې کروکي واخیستله. ددغې ځمکې مساحت ۵۵۷۳.۵ جریبه دی او ځینو اشخاصو پکې تصرفات پیل کړي.
هیئت له دغو افرادو څخه سندونه وغوښتل چې هیڅ یو نه درلودل. هیئت یاده ځمکه امارتي تثبیت کړه او دغې ساحه کې هر ډول تصرفات بند کړل.
په همدې حال کې د فراه ولایت د تخنیکي هیئت استازو ددغه ولایت د مرافعې محکمې له رییس او امنیه قوماندان سره په جلا جلا توګه وکتل.
په دغې لیدنه کې دواړو لور د ستونزو او کاري خنډونو په اړه چې د تخنیکي هیئت، محکمې او امنیه قوماندانۍ ترمنځ موجودې دي، خبرې وکړې او توافق ته ورسیدل.
