په کندز ولایت کې د ۱۶۰ جریبه امارتي ځمکې تثبیت او تشخیص
د کندز ولایت د ځمکو د غصب د مخنیوي د تخنیکي هیئت ناسته د جمادي الثاني د میاشتې په ۱۰ نېټې د یکشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په یاده ناسته کې، د مرکز د عسقلان ساحي په قوي ګذر کې د ۱۲۰ جریبه ځمکې، د علي آباد ولسوالۍ د مغدود خیلو ساحې د ۱۲ جریبه ځمکې، د حضرت امام صاحب ولسوالۍ د خروټو د ۶۰ جریبه ځمکې او د مراد شیخ باسوس ساحې د ۲۸ جریبه ځمکې دوسیې او یو شمېر عریضې بحث او بررسۍ لاندې ونیول شوې.
تخنیکي هیئت د یادو دوسیو د سوابقو له بحث او بررسۍ څخه وروسته، د مرکز د عسقلان ساحې په قوي ګذر کې ۱۲۰ جریبه ځمکه، د علي آباد ولسوالۍ د مغدودخیلو ساحې ۱۲ جریبه ځمکه او د حضرت امام صاحب ولسوالۍ د مراد شیخ باسوس ساحې ۲۸ جریبه ځمکه امارتي تثبیت او تشخیص کړه او په هکله یې لازمې لارښوونې وکړې.
د حضرت امام صاحب ولسوالۍ د خروټو ساحې د ۶۰ جریبه ځمکې په اړه هم یو پلاوي تعیین شو ترڅو یاده شوې ساحه سکیچ او سندونه پرې تطبیق کړي او د هغو کروکي واخلي.
