په ننګرهار ولايت کې د خيريه بنسټ یو دفتر تړل کېدل
د ننګرهار ولایت د خيريه بنسټونو له دفترونو څخه د نظارت پلاوي، د ربیع الاول د مياشتې په ۵ مه نېټه د یکشنبې په ورځ، د ياد ولایت اړوند د خيريه بنسټونو له یو شمېر دفترونو څخه نظارت ترسره کړ.
د دغه نظارت او بررسۍ په ترڅ کې، د خيريه بنسټ یو دفتر د غير قانوني فعالیت له امله وتړل شو او د خيريه بنسټونو پاتې د نورو دفترونو متصدیانو ته د شته نيمګړتياو د اصلاح او د کاري چارو ښه پرمخ وړلو په اړه لازمې توصیې وشوې. او همدارنګه نظارتي پلاوي له هغوی څخه غوښتنه وکړه، چې رېښتينې مستحقو ته مرستې ووېشي، د مرستو وېشلو په وخت کې انساني کرامت ته درناوی وکړي او اسلامي او افغاني ارزښتونو ته دې پام وکړي.
د ننګرهار ولایت عدلیې رياست په یاد ولایت کې په دوامداره توګه د خیریه بنسټونو له دفترونو څخه نظارت ترسره کوي تر څو د غير قانوني فعالیتونو مخنيوی وشي.
