په ننګرهار ولايت کې د خيريه بنسټونو د څلورو دفترونو تړل کېدل
د ننګرهار ولایت د عدلیې ریاست نظارتي پلاوي، د ذیالقعدې د میاشتې په ۲۴مه نېټه د پنجشنبې په ورځ، د دغه ولایت په مرکز کې د خيريه بنسټونو له یو شمېر دفترونو څخه نظارت ترسره کړ او د هغو فعالیتونه یې بررسي کړل.
د نظارتي پلاوي د دغه نظارت او بررسۍ په ترڅ کې، د خيریه بنسټونو څلور دفترونه د غير قانوني فعالیت له امله وتړل شول او د خيريه بنسټونو پاتې نورو مسؤولينو ته د شته نيمګړتياو د اصلاح او د کاري چارو ښه پرمخ وړلو په موخه لازمې توصیې وشوې.
د عدلیې وزارت په مرکز او د عدلیې ریاستونه په ولایتونو کې، په دوامداره توګه له اړوندو برخو څخه نظارت او بررسي ترسره کوي تر څو د غير قانوني فعاليتونو مخه ونيول شي.
