په فاریاب ولایت کې څه باندې د ۴۹ زره جریبه ځمکې تثبیت
د فاریاب ولایت د ځمکو د غصب د مخنیوي د تخنیکي هیئت ناسته د جمادي الاول د میاشتې په ۵ نېټې د یکشنبې په ورځ د فاریاب ولایت د عدلیې رئیس محمد حنیف منیر او د دغه هیئت د غړو په حضور سره جوړه شوه او په هغې کې ۴۹ زره او ۳۸۵ جریبه ځمکه تثبیت او تشخیص شوه.
په دغې ناسته کې، د دولت آباد او قرمقول ولسوالیو ترمنځ د ځنګل ساحې د ۴۵ زره او ۳۳۵ جریبه ځمکې، په دولت آباد ولسوالۍ کې د مهاجرینو د چارو د ریاست د ۴ زره جریبه ځمکې او په قرمقول ولسوالۍ کې د ۵۰ جریبه سیلابي ځمکې دوسیې بحث او بررسۍ لاندې ونیول شوې او یادې ځمکې تشخیص او تثبیت شوې او پریکړه وشوه چې یادې شوې دوسیې د وروستي تصمیم نیونې په موخه مرکزي کمېسیون ته واستول شي.
دغه راز په یاده ناسته کې د فاریاب ولایت د امنیه قوماندانۍ د ملکیت د غصب، د اطلاعاتو او فرهنګ ریاست د ملکیت د ۲۵ جریبه ځمکې د غصب او د دغه ولایت په دریمې ناحیې کې د ښاروالي د ملکیت د ۳۶۰۰ متر مربع ځمکې د غصب موضوع بحث او بررسۍ لاندې ونیول شوې او پریکړه وشوه چې هیئت د سه شنبې په ورځ یادو ساحو ته ولاړ شي او له نږدې څخه له غصب شویو ساحو لیدنه او بررسي ترسره کړي.
