په بادغیس ولایت کې د عدلیې ریاست او د معاملاتو لارښوونې د دفترونو یو شمېر مسؤولینو ترمنځ د همغږۍ ناسته ترسره شوه
د بادغیس ولایت د عدليې رئیس مولوي عبدالرازق مرزوقي د محرمالحرام د میاشتې په ۲۶مه نېټه دسهشنبې په ورځ، د معاملاتو لارښوونې د دفترونو یو شمېر مسؤولینو سره د دغه ریاست په مقر کې د همغږۍ ناسته وکړه.
په دې ناسته کې چې د عدلیې ریاست یو شمېر نورو مسؤولینو هم ګډون کړی وو، د عدلیې رئیس د خپلو خبرو پر مهال ټینګار وکړ چې د یادو دفترونو مسؤولین باید خپل فعالیتونه د قوانینو او اصولو مطابق ترسره کړي، له هر ډول جعل او غیر قانوني فعالیتونو څخه ځان وساتي او په خپلو کاري چارو کې غفلت ونهکړي.
په ورته مهال د یادو دفترونو مسؤولینو هم خپلې ستونزې او وړاندیزونه شريک کړل او د عدلیې رياست د همکارۍ غوښتونکي شول چې د عدلیې رياست د یادو ستونزو د حل کولو په برخه کې ورته ډاډ ورکړ.
