ننګرهار ولایت کې څه دپاسه ۶۳۰۰ جریبه ځمکه دولتي تثبیت شوه
د ننګرهار ولایت د ځمکې د غصب د مخنیوي د تخنیکي هیئت ناسته د هیئت د رئیس او غړو په حضور سره جوړه شوه او هم هیئت له ځینو سیمو څخه لیدنه وکړه او دولتي ځمکې یې پکې تثبیت کړې.
هیئت د جلال آباد ښار درېیمې ناحيې اړوند په علي خیل ساحه کې د یو وقفي جومات په اړه بحث وکړ.
یاد شوي هیئت اشخاصو ته د « شپږ جریبه ځمکو» په نوم د ځمکو د ویشلو د موضوع په اړه چې کمونستي رژیم کې ترسره شوې او د اسلامي امارت د ۲۶ ګڼې فرمان پر اساس لغو شوې هم بحث او بررسۍ لاندې ونیوله.
دغه راز تخنیکي هیئت د رودات ولسوالۍ په کان قطرغه کې د کوچیو لخوا د یو اندازه غصب شوې ځمکې په اړه بحث وکړ او ساحې ته حاضر شوو. هیئت له څیړنو څخه وروسته په ساحه کې ۶۳۰۹ جریبه ځمکه دولتي تثبیت کړه.
یاد شوي هیئت ځايي اوسیدونکو ته خبرتیا ورکړه چې ساحه کې نوي تاسیسات جوړ نه کړي او هم یې امنیتي مسوولینو ته لارښوونه وکړه چې د تاسیساتو جوړولو اجازه ورنه کړي
په همدې حال کې د خوست ولایت د ځمکې د غصب د مخنیوي د تخنیکي هیئت ناسته هم د یاد هیئت د رئیس او غړو په حضور سره جوړه شوه. او هم له ځینو سیمو څخه لیدنه وشوه.
هیئت د صبرۍ ولسوالۍ د کرړو ساحې د ۱۱۰ جریبه ځمکې په اړه چې تېره اوونۍ لیدل شوې وه، بحث وکړ او پریکړه وشوه چې سندونه او سوابق یې په دقیق ډول بررسي شي.
هیئت له غونډې څخه وروسته د ګربزو ولسوالۍ کرم ساحې ته ولاړ او له هغو ځمکو څخه چې د سکرو ډبرو د پروسس له پاره غوره شوې وه لیدنه وکړه. یو شمېر خلک یاده ځمکه خپل ملکیت ګڼي یاد شوي هیئت د شریعت له اصولو سره سم خاصه مرعی تشخیص کړه.
په همدې توګه هیئت د شنې قطعې په همکارۍ سره په خوني خوړ ساحه کې پر امارتي ځمکه د یو شمېر اشخاصو تصرفات ویجاړ کړل.
